Eth conselhèr pòrtavotz d’Unitat d’Aran en Conselh Generau, Francés Boya. Eth conselhèr pòrtavotz d’Unitat d’Aran en Conselh Generau, Francés Boya, a registrat aué ua propòsta d’acòrd entà qu’eth Plen apròve ua mocion en defensa deth modèl d’immersion en aranés ena escòla. Boya entén que “era resolucion deth TSJC pòt afectar tanben ara escòla aranesa e, per aquerò, ei indispensable qu’es fòrces politiques deth país reivindiquen qu’er aranés sigue era lengua veïculara e d’aprenedisatge, eth centre de gravetat deth sistèma d’ensenhament en Aran, e demanen ath PP e a d’autes instàncies particulars qu’acaben damb era sua politica de discòrdia ar entorn des lengües”.
Francés Boya a volut reconéisher “eth papèr clau deth collectiu de mèstres dera Val d’Aran, qu’a contribusit a qu’eth modèl d’immersion en aranés sigue un exit e un esturment d’unitat deth pòble aranés”.
Mocion en defensa deth modèl d’immersion lingüistica en aranés ena escòla
Dat qu’er aranés ei era lengua pròpria d’Aran e oficiau en Catalonha, cossent damb çò qu’establissen er Estatut d’Autonomia de 2006 e es leis de normalizacion lingüistica.
Dat qu’era immersion lingüistica ena escòla aranesa a suposat un exit de coesion sociau enes darrèrs lèu 30 ans.
Dat qu’era interlocutòria deth Tribunau Superior de Justícia de Catalonha en çò que tanh ara immersion lingüistica pòt afectar eth modèl vigent en Catalonha e Aran, es Grops politics deth Conselh Generau d’Aran propòsen ath Plen era adopcion des acòrds que seguissen:
1. Deféner era immersion lingüistica en aranés ena escòla pr’amor qu’ei garantia de coesion sociau e unitat civil deth pòble aranés.
2. Manifestar eth nòste rehús ara interlocutòria deth TSJC en referéncia ath modèl d’immersion lingüistica.
3. Dar supòrt ara Generalitat e eth Conselh Generau d’Aran en totes es mesures avientes que hèsquen possible eth manteniment d’aguest modèl.
4. Demanar ath PP e a totes es associacions e instàncies particulars que dèishen d’ahiscar era discòrdia sociau respècte des lengües e ath trencament deth modèl qu’a estat un exit pendent es sòns ans d’aplicacion.