Amassada territoriau dera candidatura olimpica Barcelona-Pirenèu 2022. Era Val d’Aran a acuelhut era dusau amassada territoriau dera candidatura olimpica Barcelona-Pirenèu 2022. I an assistit eth sindic d’Aran, Francés Boya, e eth comissionat dera alcaldia entara candidatura de Barcelona enes Jòcs Olimpics e Paralimpics d’Iuèrn, Enric Truñó, entre d’auti representants institucionaus e deth món der espòrt en Aran. Era trobada a agut lòc ena sedença deth Conselh Generau, en Vielha.
En aguesta session, s’a informat sus es auanci dera candidatura e s’an presentat es documents Construint el llegat de la Candidatura Olímpica al Pirineu e L’Esport, un factor clau en el projecte olímpic.
Enric Truñó a reconeishut era dificultat qu’era Val sigue era sedença des jòcs, pr’amor dera sua distància damb Barcelona, mès a coïncidit damb Boya en que “Aran a d’acuélher pròves olimpiques, ja que compdam damb era mielhor estacion d’esquí deth Pirenèu catalan”, en paraules deth sindic.
Entà Boya, “era candidatura represente ua dobla oportunitat: tant entà mielhorar es infraestructures, coma era N-230, coma entà definir, entre eth Conselh, es ajuntaments e eth sector der espòrt, un projècte esportiu compartit que veigue reconeishut eth Centre de Tecnificacion dera Val d’Aran, entre d’auti aspèctes fonamentaus entara promocion der espòrt en Aran”.