23
de febrer
del
2011
Informacion sus era 2au exposicion.
Arribe enguan era dusau edicion dera Exposicion d’Artistes Aranesi, qu’organize eth Departament de Cultura e Politica Lingüistica e Musèus dera Val d’Aran. Era cap deth departament, Maria Vergés , a presentat aué es bases dera mòstra, que pren eth nòm der artista aranés David Beso. “Un aumenatge postum ara òbra e persona d’aguest polifacetic artista”, segontes Vergés.
David Beso dediquèc ua part importanta dera sua vida ara sua passion, er art. Alternaue eth sòn trabalh diari damb trabalhs artistics. Guanhèc prèmis de diboish e artenhec andues bèques entà ampliar es sòns estudis ena Cambridge School Arts de Londres e ena Arts University College de Bournemouth. Nombrosi son es sòns trabalhs restacadi damb era decoracion e era tematizacion d’establiments de tot tipe.
Era exposicion, que permet dar a conéisher es òbres inedites des artistes que demoren en Aran, se classifique en dues categories: ua professionau e ua amateur. Andues pòden includir òbres bidimensionaus (pintura, diboish, tapís, gravat...) e tridimensionaus (escultura, ceramica...). Es persones interessades en participar an de presentar era sollicitud abantes deth 4 de març, en Registre deth Conselh Generau d’Aran.
Maria Vergés a explicat que “era finalitat d’aguesta convocatòria ei contribuïr ara creacion artistica, fomentar er art e era cultura, e promòir e difóner era òbra des artistes aranesi que volguen hèr-la a conéisher per miei d’ua exposicion collectiva, sense interès lucratiu”. Es òbres s’exposaràn ena sala-glèisa de Sant Joan d’Arties, deth 18 de març ath 28 de mai.