Eth Conselh Generau d’Aran an metut en marcha er European Workshop Moutain Security entara creacion deth prumèr Fòrum Europèu de Seguretat e Restacts en Espacis de Montanha. Aguesta convencion a lòc pendent aguesta setmana entà acuélher as principaus agents ena prevencion dera seguretat e es responsables des actuacions d’emergéncies e de rescat des principaus zònes de montanha, coma es Pirenèus, es Alps, eth Nòrd d’Espanha e d’auti.
En aguesta convencion, se tracten tèmes de prevencion, seguretat e rescat. Era finalitat ei compartir experiéncies e coneishements entà aumentar era qualitat des servicis des diferents grops de cada país (naues tecniques e sistèmes, protocòls de rescat mès complèts, eca.), en tot generar un servidor de coneishement e un corròp d’acòrds e collaboracions ath laguens des grops e entre es diuèrsi païsi qu’i intervien.
Eth collectiu des Pompièrs d’Aran i participe dera man des sòns responsables entà explicar era istòria e eth modèl dera sua organizacion e, per miei de TESVA e Aran Salut, era avaloracion des accidents en pistes d’esquí. Tanben se dan a conéisher es actuacions des còssi d’emergéncies e rescat en Tiròl (Àustria) e diuèrsi modèls de rescats ena montanha, damb era participacion, entre d’auti, des Mossos d’Esquadra e Bombers dera Generalitat.
Eth sindic d’Aran, Francés Boya, qu’a assistit as jornades, a explicat que “era Val d’Aran pòt devier un referent lidèr entà compartir experiéncies de montanha e atrèir eveniments, coma convencions e congrèssi, ar entorn d’aguesti ahèrs, que poguen contribuir ara dinamizacion economica dera Val mès enlà dera sason d’iuèrn”.