Prumèr Fòrum Europèu de Seguretat e Rescats de montanha, ena Val d’Aran

Eth Conselh Generau d’Aran e era empresa aranesa d’eveniments EVALIA an metut en marcha er European Workshop Moutain Security entara creacion deth prumèr Fòrum Europèu de Seguretat e Restacts en Espacis de Montanha. Aguesta convencion aurà lòc aguesta setmana, deth 5 ath 7 d’abriu.
 
Er objectiu des jornades ei crear aguest fòrum europèu, a on se dan cita es principaus agents ena prevencion dera seguretat e es responsables des actuacions d’emergéncies e de rescat des principaus zònes de montanha, coma es Pirenèus, es Alps, eth Nòrd d’Espanha e d’auti.
 
Se tractaràn tèmes de prevencion, seguretat e rescat. Era finalitat ei compartir experiéncies e coneishements entà aumentar era qualitat des servicis des diferents grops de cada país (naues tecniques e sistèmes, protocòls de rescat mès complèts, eca.), en tot generar un servidor de coneishement e un corròp d’acòrds e collaboracions ath laguens des grops e entre es diuèrsi païsi qu’i intervien.
 
Eth collectiu des Pompièrs d’Aran i participe dera man des sòns responsables entà explicar era istòria e eth modèl dera sua organizacion e, per miei de TESVA e Aran Salut, era avaloracion des accidents en pistes d’esquí. Tanben se daràn a conéisher es actuacions des còssi d’emergéncies e rescat en Tiròl (Àustria) e diuèrsi modèls de rescats ena montanha, damb era participacion, entre d’auti, des Mossos d’Esquadra e Bombers dera Generalitat.
 
Er acte d’inauguracion serà deman, 5 d’abriu, entàs 19.00 h, en Es Bòrdes dera Artiga de Casa Irene, en Valarties, a cargue deth sindic d’Aran, Francés Boya; eth president d’ATUDEM,Aureli Bisbe; e eth cap d’Adestrament e Doctrina dera Escòla Militar de Montanha e Operacions Especials de Jaca, Alberto Ayora.