Francés Boya: “Era mielhora dera N-230 non pòt demorar mès”

Eth sindic d’Aran, Francés Boya, a persutat aué en que cau abordar damb urgéncia era reparacion dera carretèra N-230, entre Vielha e eth tunèl, dempús d’un nau incident qu’a agut lòc aué en aguest tram. Entath sindic, “era mielhora dera N-230 non pòt demorar mès”.

Eth sindic a previst entrevistar-se damb eth conselhèr de Territòri e Sostenibilitat dera Generalitat , ath quau li darà a conéisher eth besonh d’executar damb celeritat aguestes òbres, dejà projectades, e priorizar-les dauant eth Ministèri de Foment.

Aguesta actuacion, er acòrd dera quau se pren ena comission mixta entre er Estat e era Generalitat, se derive dera inversion qu’er Estat a de realizar en Catalonha en matèria d’infraestructures, d’acòrd damb eth mandat dera disposicion addicionau tresau der Estatut.

Francés Boya a rebrembat que ja en an 2003, estant deputat en Parlament, presentèc ua propòsta entà mielhorar aguesta via que connècte Aran damb Lhèida, pr’amor que “se tracte d’ua via de comunicacion estrategica entara província”